1. تنويه:
    تم إيقاف التسجيل في المنتدى مؤقتا، للتواصل أو طلب الانضمام للمنتدى، نرجو التواصل معنا.
    الأعضاء السابقون ما يزال بإمكانهم تسجيل الدخول.

قررت أبقى هبلة وعيلة وحمارة إذا لزم الأمر !

هذا النقاش في 'الواحة' بدأه smsm_lll، ‏25 يونيو 2009.

  1. smsm_lll

    smsm_lll عضو جديد

    حكيت لكم المرة اللى فاتت عن حكايتى مع اللحاف اللى مقمش بدور خط بارليف خالص
    تعلوا بقى أحكى ليكم موقف جامد جدااااااااا


    سنه 2005 تقريبا يعنى
    فى السنه دى قابلت كابوس اسمه " الثانويه العامة " خلى الواحد يحس إنه كبر وبقى من أسياد المدرسة ،
    وده كان الوقت اللى ظهرت فيه واحده صاحبتى بتحاول تقنعنى إننا -- لازم ولابد ! -- نزوغ من الحصص بقى
    عشان دى تبقى شهادة ميلادنا الحقيقة ، ودليل خروجنا من مرحلة الطفولة ، وكانت دايما تقول لى
    "" ما تبقيش هبلة وعيلة ، الواد لما يكبر بيشرب سجاير ، والبنت لما تكبر تزوغ من الحصص ، ده التطور الطبيعى
    للحاجه الساقعه ، ده ختم النسر يا بنتى لازم كلنا ناخده وإلا ... النسر يزعل مننا !! ""

    وعشان كده قررت إنى أكبر وأزوغ
    وأنا مين أنا عشان أقف قدام النسر بحاله ؟!
    وقررنا إن أول حصة هنزوغ منها حصة الرسم عشان ماحدش يشك فينا .

    عنها وقعدنا نرسم ونخطط يومين بحالهم ، لكن فى لحظة تجلى رمينا كل الخطط ورا ضهرنا ،
    لاننا لقينا الحل بسيط قوووى " ممكن نروح الحمام ؟ " بس كده ، ونزلنا لعبنا واحتفلنا بوصولنا لسن الانحراف عن اقتدار ،
    والنسر فرحان قاعد يرفرف فوقنا ويغمز لنا !
    بعد كده قررنا نطلع الفصل وأول الميس ما تخرج ندخل ناخد شنطنا ، وأهو كده تبقى الجريمة الكامله
    وفعلا خرجت واستخبينا لحد ما مشيت ، وبعد كده دخلنا الفصل واحنا بنضحك وبنغيظ أصحابنا العيال ،

    لكن كانت فى مصيبة فى انتظارنا ، أيوة ..... أيوة ... كلكم شطار .....

    بقدرة قادر لقينا سعادة حضرة جناب الناظر فى انتظارنا فى الفصل ، مش بس كده
    لا ولقيت بابا بجلالة قدرة ، معاه وبيبص ليا بغل وغيظ
    أتارى المسكين كان جاى يسأل عليا وفى اليوم ده بالذات .... مع ملاحظة سعادتك إن السنه 365 يوم !!
    شقتم حظ أحلى من كده ؟!

    وبعد ساعات من الاستماع إلى محاضرة من الأب المخدوع " أل يعنى مكنش بيزوغ "
    - صدرت قرارات الناظر التاريخية - كان بيهدى النفوس
    على النحو التالى : صاحبتى خدت استدعاء ولى أمر ، وأنا " بما أن ولى أمرى حاضر ومنور المنطقه كلها " أخدت فصل يومين !!
    وطبعا كانوا ألطف يومين فى حياتى ، صحيح الضرب كان بيجى من كل ناحية ، من غير حتى ما أقوم من مكانى
    خدمة خمس نجوم !
    والشتيمة و تلقيح الكلام كانت ولا موسم المطر
    بس سيبك إنت الضرب للجدعان والشتيمة للأجدع
    ومن يومها قررت أبقى هبلة وعيلة وحمارة إذا لزم الأمر ، وأجلت حلم التزويغ للجامعه أو لما بابا يطلع إعارة

    قولوا أمين :fish:
     

شارك هذه الصفحة