خرفات كمال الاجسام وكثرة الفتاوي

يا جماعة انا لاقيت الموضوع دة وحبيت انقلة لانة مفيد جدا عشان كلنا نستفاد ونصحح معلومتنا عن الرياضة الجميلة دية
موضوعى عن ( خرافات و افتكاسات كمال الاجسام )

اكيد كلنا بنواجه الموضوع ده ... كل واحد تسألوا يقولك اعمل كذا و اوعى تقرب من كذا و العب معرفش ايه و العب التمرينة ديه و لازم تلعب كل التمارين للعضلة و انت بكدة يتتوه المبتدىء اللى جى يسألك او ممكن كمان تتوه واحد قديم و تحيره ب 40 رأى من كل واحد شكل و طبعا مش عارف يسمع كلام مين ولا مين يقوم سايب اللعبة فى اقل من شهر

هات بقى شوية فشار او كيس شيبسى و اقرى يا معلم الافتكاسات الكتيرة اللى ملهاش اى لازمة

1- و من اكبر الافتكاسات ( اتمرن زى البطل عشان تبقى بطل )

الكلام اللى موجود فى المجلات الكتير و اللى الكابتن بتاعك يقولهولك او واحد قديم فى الجيم مثلا انك تلعب كل يوم و متريحش خالص عشان العضلة تزيد و تكبر ده كله كدب فى كدب و تحوير عشان يبيعوا منتجاتهم بس
انت لما تخشلى تمرينة بنش مثلا و تروح لاعب زى ما قالولك بنش عالى بار و دمبل و تفتيح و بعدين مسطح بار و دمبل و تفتيح و مقلوب هكذا بردو و تقوم رايحلى على الاوفر و تخلص تقوم داخل باى

انت كدة بتموت نفسك يا عم و تعدلى ساعتين او 3 فى الجيم !!! ليييه بالطريقة ديه هتتسبب فى انك تتمزق او تجهد العضلة زيادة ( اوفر تراينينج ) و تقل منك و ترجع متلاقيش نتيجة فى الاخر تروح سايب اللعبة يا كبير .. نصيحة ( العب قليل و صح .. كل كتير و مفيد .. حجمك يزيد ) حلو اوى انك تلعب يوم بارات بس و يوم دامبل بس .. و هكذا .. نوع فى تمرينتك و متعودش جسمك على حاجة معينة


2- ( اتدرب لحد ما العروق تبان )

يا جماعة العرق فى العضلة بيبان لما العضلة تتحط تحت ضغط معين ده بيزود ضخ الدم فيها مش معنى ان العرق باين عندك يبقى انت كدة بتلعب صح و العضلة بتزيد .. العضلة تزيد لما تلعب بأوزان تقيلة و تتغذى كويس و تشغل الياف العضلة عن طريق الحركة الكاملة للتمرينة .. مش لما تعملى 100 عدة باى و تلاقى العرق بان عندك يبقى انت كدة واد معدى

لما دهون جسمك تقل هتلاقى عروقك كلها بانت و ساعتها تتأكد انت بتصفى الدهون مش بتزود حجمك


3- و جينا لأهم و اشهر افتكاسة فيهم كلهم ( الاعداد القليلة للضخامة و الاعداد الكتيرة للتقسيم و التشريخ )

اللى الناس فهماه انك كل ما تخفف وزن و تلعب اكتر هتشرخ و تزود وزن و تلعب اقل هتضخم و ده اكبر غلط .. يا جماعة العضلة ليها 3 حالات بس

يا اما بتزيد و تكبر يا اما زى ما هى يا اما بتقل و تنكمش

مفيش حالات غير ديه .. لو عايز تكبرها علطول غير الروتين اللى انت ماشى عليه و الوزن بتاعك يزيد دايما و تلعب صح من غير مساعدة و تلعب حركة كاملة و تغذية كويسة

عايز تخليها زى ما هى افضل اعمل الروتين اللى بتعمله دلوقتى و شغال عليه

عايز تخليها تنكمش مفيش اسهمل من كدة يا عم .. قعد فى بيتكوا و متنزلش الجيم تانى

مفيش حاجة اسمها التمرين ده بيقسم و التمرين ده بيضخم .. التقسيم ناتج من حاجتين و هما عضلة نضيفة معليهاش فاتس .. و تانى حاجة هى نسبة الفاتس اللى فى جسمك تكون قليلة

الاوزان الخفيفة عمرها ما تبنى عضلات .. هى بتحرق السعرات الحرارية مش اكتر .. و لو عايز تحرقهم يبقى اجرى افيدلك او نط الحبل


4- ( السبت: بنش .. الاحد: ظهر ,,,,,, )

هو مش دستور لازم تمشى عليه .. انت لو عايز تزيد يبقى لازم تنوع فى الروتين بتاعك .. الروتين ميقعدش معاك اكتر من شهرين او اقل كمان
بس خد بالك و انت بتغير الروتين عشان متجهدش نفسك و العضلة على الفاضى

مع العلم ان العضلة بتزيد فى الراحة مش فى الجيم .. ريح اكتر تزيد اكتر .. ممكن تلعب 3/4 ايام و تريح الباقى .. متلعبش العضلة كل يوم عشان تزيد معاك .. كدة لو اتنطت عمرها ما هتزيد .. مرة واحدة فى الاسبوع لكل عضلة حلو اوى


5- ( فاجىء العضلة و خليها تخمن انت عايز ايه )

هههههههههه .. ديه اكتر واحدة مضحكة فعلا .. تروح للكابتن يقولك لازم تفاجىء العضلة بتاعتك .. حزر فزر يعنى

هى النظرية فعلا صح .. لكن طريقة تنفيزها بتتم غلط خالص .. العضلة معندهاش عينين عشان تشوف انت الاول كت بتلعب بالبار و بعد كدة عملت نفس الحركة بس بالدمبل .. لا لا كدة لازم ازيد بقى ههههههههههه

مفاجأة العضلة مش بنفس التمرين بأداة مختلفة و لكن بحركة مختلفة كمان .. العضلة بتفهم الحركة مش التمرينة
عايز تفاجىء عضلتك يبقى مثلا بدل ما كت بتلعب علطول تجميع دمبل .. العب تفتيح .. كدة العضلة تزيد معاك .. و زى ما قلت قبل كدة غير الروتين دايما و متسبتش على حاجة


6- ( كل ما تطول فى الجيم و فى تمرينتك كل ما تزيد اكتر )

و ده اكبر غلط كتير من الناس بتعملوا و حتى الناس القديمة فى اللعبة بالطريقة ديه بيجهدوا نفسهم و عضلتهم فى ناس بتبقى نايمة فى الجيم و صبح و ليل و تعد 4 ساعات تلعب

ياجماعة هرجع و اقول تانى اللى بيزود العضلة ( تغذية سليمة .. فترة راحة مناسبة .. تمرينة ذكية ) .. اخرك فى الجيم ساعة او ساعة و ربع لو انت مفترى .. اكتر من كدة انت بتهد العضلة مش بتبنى اى حاجة و بتتعب نفسك على الفاضى و المليان ولا هتحس بأى فرق


7- ( وجع العضلة دليل على نموها و زيادتها )

بردو ناس كتير تقولك لو محستش ان العضلة وجعاك يبقى انت مبتزدش و لو حسيت كدة تانى يوم اتأكد انها بتكبر

ده كلام ولا ليه اى لزمة .. العضلة تعرف انها زادت لما تلاقي نفسك بتشيل اوزان اتقل .. بتعلب اعداد اعلى .. حجمك بيزيد تبع القياسات و ميزانك بيزيد


8- ( شرب المكملات فى ايام الراحة بيديك دهون )

لما تشرب المكمل بتاعك لو كان بروتين فى ايام الراحة عمره ما هيديك دهون بالعكس ده بيساعد جدا فى عملية شفاء العضلة و بيخلنى نسبة النيتروجين و الاحماض الامينية فى جسمك متساوية .. بالتالى هتحس بفرق فى التمرين


9- ( اى حاجة المحترفين بيعملوها ( روونى/جاى ) يبقى انا كمان هعملها و هتجيب نتيجة )

اكبر غلط ممكن تعمله فى حياتك انك تتمرن زى واحد من المحترفين اللى متعرفوش يا معلم ان المحترف ممكن يكون بيجهد نفسه فى الجيم ( اوفر تراينينج ) و يعد ساعات كتير يلعب و يعملك 20 مجموعة على معرفش 100 عدة .. لو عمل زيه يبقى كأنك بتنتحر و الله

يا فندم .. المحترفين كل حياتهم منشطات فى منشطات .. فا مهما عملوا فى الجيم مش مهم لأنه كدا كدا حجمه بيزيد من غير دهون حتى لو بيلعب غلط


10- ( كل اى حاجة و متخفش مدام بتتمرن )

بردو تروح الجيم تقول للكابتن انا باكل كل حاجة بس عايز اربى عضلات هيقولك ماشى مش مهم ايدك على فلوس الاشتراك .. يا جميل اللعبة ديه تغذية و راحة .. لو مظبطش اكلك و مشيت على نظام غذائى كويس ملائم ليك يبقى ولا ليه اى لازمة اللى بتعمله .. انت عايز تفهمنى انك اول ما تخلص تمرينة رهيبة تروح البيت تضربلك 4 سندوتشات برجر ولا فراخ محمرة .. يا عم كل ده دهون ملهاش اى لازمة .. ابوس ايدك ابعد عن المحمر و المشمر ده .. خليك فى المسلوق دايما و الخضار حلو جدا و مفيد .. مع العلم ان جسمك بيحتاج نسبة دهون بس مفيدة
ديه بتلاقيها فى سمك التونا .. مش مضرة بالجسم ديه و زيت الزيتون .. و حاجات كتير تانية


11- ( انت ممكن تبقى ضخم اد المحترفين من غير منشطات )

اهو ده الهبل بعينه .. كل واحد يخشلك الصالة بتاعته يلاقيلك كام صورة عملاقة متعلقة عال حيطة .. يقولك ياااه امتى ابقى زى دول تلاقى الكابتن فى ضهرك .. ان شاء الله بس استمر معانا بس و هتبقى قدهم بس هتاخد وقت حبتين .. واحدة واحدة تلاقيه بيجيب رجلك عشان تاخد مكمل من عنده ( اكيد مضروب ) شوية كمان يقولك بص انا هديك حقنة تخليك سوبر مان .. و ضر نفسك يا ناصح بقى

المحترفين دول بياخدوا منشطات منسابة ليهم .. لكل محترف دكتور خاص بيه و يعرف ايه انسبلوا عشان ياخدوا .. مع العلم ان تقبل الجسم للمنشطات او المكملات ديه حاجة جينية وراثية

12- ( لعب الحديد هيوقف نموك )

النقطة ديه مهمة اوى للناس الصغيرة فى السن .. تروح الصالة الكابتن يقولك متلعبش و انت واقف و علطوا خليك قاعد و معرفش اعمل ايه عشان تطول و متعملش ايه عشان متقصرش

الدراسات اثبتت انك ممكن تبتدى تلعب من سن 8 سنين .. ارنولد كان بيتمرن فى مرحلة نموه و مع ذلك نموه موقفش .. فا ده كله اشاعات




سبب بقى الاشاعات ديه مييييييييين .. معظمهم المبتدئين .. كل مبتدىء يعملك افتكاسة جديدة و تمرينة غريبة و يقولك ده الصح حتى جرب و هتحس بالعضلة شغالة .. يا عم الكبير انا لو مسكت علبة بيبسى و اعدت احركها فى الهوا العضلة هتشتغل هههههههههه

و كل مبتدىء يسمع كلمة من واحد ملوش خبرة اساسا فى اللعبة يقوم ناشرها بقى و يبقى دستور فى الصالة و بردو المجلات سبب اخر للاشاعات ديه .. عايزين يبيعوا يعملوا ايه يعنى !!!



موضوعى خلص يا جماعة .. انا عارف انا خبطت فى ناس قديمة كتير و حطمت افكار ناس جديدة .. اعتذر عن كدة
بس ديه الحقيقة .. ارجو ان محدش يزعل منى
انا زى اخوكوا .. جى انصحكوا مش اكتر .. اتمنى انى اكون افاتدكوا .. و شكرا

 

مشكوووووووووووووووووووووور اخى الفاضل

 

العفو كابتن محمد

 

مشكور على الموضوع كابتن اسلام ولكني غير متفق معاك ولو ان الموضوع منقول على النقطة الثالثة فيه بالنسبة للتكرارات فالجسم بالنسبة لقوله زياده بالوزن ودفعات اقل تكبر العظله نعم وه تغيير نوع التمرين ولكن التكرار باوزان ثابته وتكرارات عالية توخذ بعد ان تكون العضلة كبيره ولكنها ليس فيها تقطيع وانا معاك وهو المطلوب من تنشيف العضلة من الدهون المحيطه بها فالرياضي ياخذ هذا التمرين لكي ينشف العظلة من الدهون المحيطة وليست فقط حرق السعرات الحرارية وليس كل انسان جسمه ناشف من الدهون للتغيرات الفسلجية والبيئية فتمرين التكرار فضلا عن تقطيع وتنشف العضلة يزيد من مطاولة العضلة وتحملها وهذه وجهت نظري تحتمل الصحة وتحتمل الخطء وفوق كل ذي علم عليم واسف على هذه المداخلة

 

شكرا ليك كابتن هيثم علي الاضافة الجميلة وانا متفق معاك في النقطة دية لاني اتصدمت لما قريت الموضوع لاني كنت سا عات بتمرن بوزن خفيف وتكرار عالي عشان انشف
وشكرا ليك علي مرورك الجميل واضافاتك الرائعة

 

موضوع مفيد جدا جزاك الله خيرا

 

شكرا ليك علي مرورك الجميل كابتن كاراتية

 

هههههههههههههه
موضوع حلو بذات موضوع النمو....
انا قريت مواضيع عن تطويل الجسم(انا مش قصير) لقيتها خرافات زي اربط حجر في رجلك و اتشعلق في الهوا
بس موضوع حلو كابتن روني

 

كلامك صحيح أخي الكريم مشكور عالمعلومات الجميلة

 

السلام عليكم ورحمة الله وبركاته
مشكور يا كابتن على الموضوع الشيق والمعلومات الجيدة الجديدة بالنسبة لي على الأقل

أنا بدأت تمارين من فترة فليلة وفعلا حصل معايا حكاية المدرب دي بس قررت من ساعتها إني مبدأش تمارين حديد دلوقتي وبدأت في السويدي لأني بحس إن تقوية الجسم بالجسم أفيد وبعيدة عن أضرار كتير

ومشكور مرة تانية

 

مشكور اخوي على الموضوع المهم

 

اسف يا جماعة علي التأخير واعذروني عشان كان عندي امتحانات ومشكور علي مروركم الجميل

 

مشكور جدا

 

شكرا موضوع مميز جدا وشي جديد وجميل في المنتدى

 

مشكوووووووووووووووور اخي الفاضل

تحياتي لك

 

ربنا يكرمك على المعلومات ديه
انت بتتكلم كانك قاعد معانا فى الجيم وعارف الدنيا ماشيه ازاى
ربنا يجعله فى ميزان حسناتك

 

شكرا لكن أنت من وين أخذت مصادرك